Aidiyyəti dövlət qurumlarının, turizm şirkətlərinin, aqroturizm və qonaqlama xidməti göstərən təsərrüfat subyektlərinin nümayəndələrinin, bloqerlərin və ekspertlərin iştirakı ilə keçirilən konfransı giriş sözü ilə açan “Regional İnkişaf” İctimai Birliyinin nümayəndəsi, layihənin koordinatoru Şəhla Talıbzadə çıxışında zəngin turizm-rekreasiya ehtiyatlarına - rəngarəng iqlimə, təbii və müalicəvi su ehtiyatlarına, əlverişli nəqliyyat infrastrukturuna, ekoloji təmiz ətraf mühitə malik, eləcə də tarixi, mədəniyyət və təbii abidələrlə zəngin olan, “Qədim İpək Yolu”nun üzərində yerləşən Tovuz rayonunda aqroturizmin inkişafına dəstək vermək və onun turistlər üçün cəlbediciliyini artırmaq məqsədilə layihə çərçivəsində nümunəvi aqroturizm və qonaqlama xidməti göstərən təsərrüfat subyektlərinin yaradıldığını, işçi heyətinin beynəlxalq təcrübəyə uyğun təlimləndirildiyini və ictimai məlumatlandırma tədbirlərinin həyata keçirildiyini bildirdi.

Tovuz Rayon İcra Hakimiyyətinin nümayəndəsi Alı İbrahimov, Kiçik və Orta Biznesin İnkişafı Agentliyinin nümayəndəsi Nəriman Zamanov, Gəncə Regional Turizm İdarəsinin nümayəndəsi Seymur Mirzəyev, Tovuz Dövlət Aqrar İnkişaf Mərkəzinin nümayəndəsi Vüqar Əhmədov, aqroturizm üzrə ekspert Fərid Mustafayev, təsərrüfat subyektlərinin nümayəndələri və bloqerlər çıxışları zamanı Azərbaycanda, o cümlədən ölkənin qərb bölgəsində aqroturizmin inkişafı üçün geniş imkanların olduğunu, son illər kənd yerlərinin inkişafı və əhalinin məşğulluğunda mühüm rol oynayan aqroturizm və qonaqlama xidməti göstərən təsərrüfatların yaradılması və onlar tərəfindən göstərilən xidmətlərin keyfiyyətinin artırılması istiqamətində əhəmiyyətli işlərin görüldüyünü, kənd turizminin bu sahəsinin inkişaf tempinin artırılması üçün yerli icmaların yaradılması və inkişafının təşviqi, məhsulların saxələndirilməsi, aqtoturizm sektorunda dövlət-özəl əməkdaşlığının genişləndirilməsinin zəruriliyini bildirdilər.

Konfransda səslənən təkliflərin bölgədə aqroturizmin inkişafına dair gələcək tədbirlərin və layihələrin həyata keçirilməsi məqsədilə aidiyyəti üzrə təqdim edilməsi qərarlaşdırıldı.

Məlumat üçün bildiririk ki, konfrans çərçivsində, həmçinin ölkəmizdə tanınmış turizm bloqerləri üçün təsərrüfat subyektlərinə turlar təşkil olunub. Onlar heyvandarlıq, arıçılıq və bağçılıq sahələrində yaradılmış aqroturizm təsərrüfat subyektləri və qonaqlama xidməti obyektlərində yaradılan şərait və göstərilən xidmətlərlə yaxından tanış olmaq imkanı əldə ediblər. 

FOTO