“Qərbi Azərbaycan: Tarixin izi ilə” layihəsi çərçivəsində növbəti görüş İmişli gəncləri ilə keçirilib
Martın 7-də Qərbi Azərbaycan İcması (QAİ) və “Regional İnkişaf” İctimai Birliyinin (RİİB) birgə təşkilatçılığı ilə “Qərbi Azərbaycan: Tarixin izi ilə” layihəsinin İmişli şəhərində növbəti məlumatlandırıcı sessiyası keçirilib.
Görüş iştirakçılarını salamlayan İmişli rayon İcra Hakimiyyətinin
başçısı Elçin Rzayev regionlarda gənclərlə davamlı olaraq keçirilən bu cür tədbirlərin
Qərbi Azərbaycan ilə bağlı faktların geniş ictimaiyyətə çatdırılmasında, xüsusilə
gənclərin tarix və milli kimlik barədə məlumatlılığının artırılmasında əhəmiyyətini
vurğulayıb.
“Regional İnkişaf” İctimai Birliyinin nümayəndəsi Aqil
İsmayılzadə layihə çərçivəsində bugünədək paytaxt və regionlarda ictimaiyyət
nümayəndələrinin və gənclərin iştirakı ilə müxtəlif sessiyaların, bilik
yarışlarının keçirildiyini, bugünkü görüşün Qərbi Azərbaycan tarixi,
coğrafiyası, mədəniyyəti, incəsənəti, ədəbiyyatı, görkəmli ictimai xadimləri və
tarixi şəxsiyyətləri, toponimləri, folkloru, eləcə də Qərbi Azərbaycandan zorla
çıxarılmış soydaşlarımızın öz doğma yurdlarına qayıtması istiqamətində ölkəmizin
haqlı mövqeyi barədə İmişli gənclərinin maarifləndirilməsində rolunu diqqətə
çatdırıb.
QAİ Gənclər Şurasının sədr müavini, Milli Məclisin deputatı
Naqif Həmzəyev çıxış edərək icmanın fəaliyyəti, Azərbaycanlılara qarşı tarixi ədalətsizliklər
və onların Ermənistan ərazisindən deportasiyasından danışaraq, soydaşlarımızın
ata-baba yurdlarına qayıtması istiqamətində ölkəmizin haqlı mövqeyinin dünya
ictimaiyyətinə düzgün çatdırılması, tarixi həqiqətlərin yayılması və müdafiəsində
gönclərin üzərinə düşən vəzifələrdən danışıb.
Qərbi Azərbaycan İcmasının üzvü, professor, Azərbaycan
Jurnalistlər və Yazıçılar birliklərinin fəxri üzvü Çingiz Abdullayev Qayıdış
konsepsiyası barədə məlumat verərək, beynəlxalq hüquq çərçivəsində bu məsələni daim
gündəmdə saxlamaq və dünya ictimaiyyətinə çatdırmaq üçün sistemli fəaliyyət
göstərməsinin vacibliyini vurğulayıb.
Daha sonra Qərbi Azərbaycan İcmasında gənclərlə iş üzrə məsul
şəxs Anar İrzaquliyev Qayıdış konsepsiyasının müddəaları, görülmüş və
planlaşdırılan fəaliyyətlər barədə təqdimat təqdim edib.
Sual-cavab formatında işini davam etdirən görüşdə iştirakçılar
Qərbi Azərbaycanla bağlı tarixi faktlar, hüquqi məsələlər, gələcək planlar barədə
müzakirələr aparmış, gəncləri maraqlandıran suallar cavablandırılmışdır.
Tədbirin ikinci hissəsində gənclər arasında sual-cavab oyunu keçirilmiş, qalib iştirakçılara hədiyyələr təqdim edilmişdir.