Ötən il 35 ölkədən 75 gənc müəllimin iştirakı ilə start götürən və iqlim üzrə təhsilverənlərin qlobal hərəkatını dəstəkləyən növbəti İqlim Dəyişmələri üzrə Yay Düşərgəsi COP29-un prezidenti və Azərbaycan Respublikası Prezidentinin iqlim məsələləri üzrə nümayəndəsi Muxtar Babayevin çıxışı ilə açıq elan olunub. M.Babayev iqlimə dayanıqlı gələcək üçün iqlimə həssas insan kapitalının inkişafında təhsil sistemlərinin mühüm rol oynadığını vurğulayıb. Ardınca Şamaxı Rayon İcra hakimiyyətinin başçısı Tahir Məmmədov tədbir iştirakçılarını salamlayaraq onlara uğurlar arzu edib. Daha sonra COP29-un İqlim üzrə yüksək səviyyəli çempionu və Azərbaycan Respublikası Milli Məclisinin deputatı Nigar Arpadarai çıxış edərək yaşıl iş yerləri üçün işçi qüvvəsinin bacarıqlarının inkişaf etdirilməsində təhsilin vacibliyindən bəhs edib. COP29-un İqlim üzrə gənclər çempionu və Qoşulmama Hərəkatı Gənclər Təşkilatının sədri Leyla Həsənova gənc müəllimlərə texniki biliklər qazandırması ilə yanaşı, düşərgənin ekoloji şüurun formalaşdırılması prosesini dəstəklədiyinə də diqqət çəkib. Açılış mərasimi “Regional İnkişaf” İctimai Birliyinin layihələr və könüllülərlə iş şöbəsinin müdiri Adilə Əliyevanın nitqi ilə davam edib. O, təhsil vasitəsilə qlobal iqlim müzakirələrini yerli təşəbbüslərlə əlaqələndirən və müəllimlər arasında qarşılıqlı öyrənməni təşviq edən düşərgənin gənclərin iqlim prosesinə cəlb olunmasında əhəmiyyətini qeyd edib.

2024-cü ildə COP29-un İqlim üzrə gənclər çempionunun təşəbbüsü ilə start götürən və növbəti dəfə 2025-ci ildə Birləşmiş Millətlər Təşkilatının (BMT) İqlim Dəyişmələri üzrə Çərçivə Konvensiyası, BMT-nin Təhsil, Elm və Mədəniyyət Təşkilatı (YUNESKO), YUNESKO-nun ixtisaslaşmış strukturu olan Ömürboyu Öyrənmə İnstitutu, BMT-nin Uşaq Fondu (UNICEF), Beynəlxalq Bərpa Olunan Enerji Agentliyi (IRENA), FEE (Foundation for Environmental Education), CEE (Centre for Environment Education), Qoşulmama Hərəkatı Gənclər Təşkilatı və “Regional İnkişaf” İctimai Birliyinin tərəfdaşlığı və dəstəyi ilə baş tutan beynəlxalq düşərgədə ümumilikdə 20 ölkədən 46 gənc müəllim iştirak edir.

COP29 İqlim Dəyişmələri üzrə Yay Düşərgəsi iqlimə həssas yeni nəsil müəllimlərin formalaşmasına töhfə verərək, sinif otaqlarından cəmiyyətə yayılan təsir yaratmaq, ortaq təcrübələri paylaşmaq və daha yaşıl dünyaya keçidi təşviq etmək məqsədi daşıyır. COP29-un Gənclər üzrə İqlim Çempionunun missiyasını davam etdirən bu təşəbbüs iştirakçıları iqlim dəyişmələri, COP prosesi və dayanıqlılıq sahələrində zəruri bilik və bacarıqlarla təmin edərək məktəblərdə və icmalarda dayanıqlı dəyişikliklərə təkan verir. Eyni zamanda tədbir “Greening Education Partnership” təşəbbüsünə töhfə verməklə yaşıl məktəblərin inkişafını dəstəkləyir. Avqustun 29-dək davam edəcək düşərgə gələcək nəsilləri iqlim fəaliyyətində aktiv iştirak etməyə ruhlandırmağı hədəfləyir.

FOTO