İqtisadiyyat və İdarəetmə Sahəsində Tədqiqatçıların VII Beynəlxalq Elmi Konfransı (ISCEMR-2025) keçiriləcək
3 aprel 2025
Paylaş

Hörmətli tədqiqatçılar, Böyük məmnuniyyət hissi ilə qeyd etmək istərdik ki, 12-14 iyun 2025-ci il tarixlərində Azərbaycan Dövlət İqtisad Universiteti (UNEC), Heydər Əliyev Mərkəzi, Beynəlxalq Magistratura və Doktorantura Mərkəzi və “Regional İnkişaf” İctimai Birliyinin təşkilatçılığı, Paşa Holdinq şirkətlər qrupunun baş sponsorluğu ilə İqtisadiyyat və İdarəetmə Sahəsində Tədqiqatçıların VII Beynəlxalq Elmi Konfransı (ISCEMR-2025) keçiriləcəkdir.
“UNEC-in 95 illik yubileyi” çərçivəsində təşkil olunan bu ilki konfrans “Dairəvi iqtisadiyyat və dayanıqlı ekosistem” mövzusuna həsr olunmuşdur.
Bu çərçivədə konfrans məruzə sessiyaları və online vörkşoplarla yanaşı Heydər Əliyev Mərkəzində “Cop-29 Azərbaycan töhfəsi: İqlim dəyişikliyi və maliyyələşdirilməsi, resurslardan səmərəli istifadə” və “Dairəvi iqtisadiyyatın drayverləri: Rəqəmsal transformasiya və dayanıqlı ekosistem” mövzularında panel müzakirələr təşkil olunacaqdır.
Konfransa tədqiqat işlərinin göndərilməsi üçün son tarix 30 aprel 2025-ci ildir.
Elmi zənginliklərlə dolu konfransda görməkdən duyacağımız məmnunluq hissini öncədən bildirir və hər birinizə uğurlar arzulayırıq.