"Aprel – dünya autizm maarifləndirmə ayı" çərçivəsində konsert proqramı təşkil olunub

Martın 29-da "Aprel – dünya autizm maarifləndirmə ayı" çərçivəsində İsveçrə Konfederasiyasının Azərbaycandakı Səfirliyi, “Regional İnkişaf” İctimai Birliyi, “Birgə və Sağlam” İctimai Birliyi, Paşa Mall və Gəncə Mall-un birgə əməkdaşlığı ilə Gəncə Mall əyləncə və ticarət mərkəzində autizmli gənclərdən ibarət “Mavi Ürəklər” inklüziv musiqi qrupunun konsert proqramı keçirilib.
Tədbirdən öncə qrupun üzvləri üçün
Nizami Gəncəvi Məqbərəsinə və Gəncə şəhərinin digər görməli yerlərinə
ekskursiya təşkil edilib.
Tədbirdə qonaqları salamlayan Cənubi
Qafqaz üzrə İsveçrə Əməkdaşlıq Təşkilatının Regional Direktor müavini Gi Bonvan
tədbirin Gəncə şəhərində keçirilməsinin əhəmiyyətini vurğulayaraq, bu təşəbbüsün
yerli sakinlərin autizm mövzusunda məlumatlılığının artırılmasına və autizmli fərdlərə
qarşı daha həssas yanaşmanın formalaşmasına töhfə verəcəyini qeyd edib.
Daha sonra “Birgə və Sağlam” İctimai
Birliyinin sədri Aytən Eynalova çıxış edərək birliyin autizm sahəsində gördüyü
işləri qeyd edib və tədbirin təşkilində göstərdiyi dəstəyə görə tərəfdaşlara təşəkkürünü
bildirərək, autizmli fərdlərin cəmiyyətə inteqrasiyasını təmin etmək üçün əməkdaşlığın
və dəstəyin vacib olduğunu vurğulayıb. O, həmçinin qeyd edib ki, birliyin nəzdində
fəaliyyət göstərən Gəncə Autizm Mərkəzi autizmli şəxslərə təhsil verməklə
yanaşı autizm haqqında davamlı maarifləndirmə işləri də aparır.
Sonda “Regional İnkişaf” İctimai
Birliyinin əməkdaşı Gülpəri Məmmədova çıxış edərək birliyin inklüzivlik sahəsində
həyata keçirdiyi layihələrdən bəhs edib. O, “Regional İnkişaf” İctimai
Birliyinin fəaliyyətində bu həssas kateqoriyadan olan uşaqlara dəstəyin hər
zaman diqqətdə saxlanıldığını qeyd edib və gələcəkdə bu sahədə fəaliyyətin
genişləndirilməsinin vacibliyini vurğulayıb.
Daha sonra “Mavi Ürəklər” inklüziv
muqisi qrupu rəngli repertuarlardan ibarət əyləncəli musiqi proqramı ilə çıxış
edib. Konsert zamanı autizmli gənclər tərəfindən müxtəlif çalğı alətlərində
ifalar təqdim edilib, eyni zamanda bir-birindən fərqli mahnılar səsləndirilib.
Tədbirdən sonra “Coffeemania” kafesinin
dəstəyi ilə qrup üzvlərinə axşam yeməyi verilib.
Qeyd edək ki, tədbirin məqsədi cəmiyyəti autizm haqqında məlumatlandırmaq, autizmli şəxslərə düzgün münasibət təbliğ etmək, həmçinin autizmli şəxslərin bacarıqlarına, istedadlarına inam aşılamaq olub.