Heydər Əliyev Fondu, Heydər Əliyev Mərkəzi, “Regional İnkişaf” İctimai Birliyi (RİİB), COP29 Azərbaycan Əməliyyat Şirkəti, Media Təhlil Mərkəzinin əməkdaşları və RİİB könüllülərinin iştirak etdiyi təqdimatda Azərbaycan Respublikasının Prezidenti cənab İlham Əliyev və Birinci vitse-prezident, Heydər Əliyev Fondunun prezidenti Mehriban xanım Əliyeva tərəfindən 2004-cü ildən həyata keçirilən çoxşaxəli tədbirlər, peşəkar idarəçilik, ölkəmizin malik olduğu resurslardan və imkanlardan effektiv və səmərəli istifadə sayəsində Azərbaycanın davamlı inkişafı, əhalinin sosial rifahının yüksəldilməsi, iqlim dəyişikliyi təsirlərinin və karbon emissiyasının azaldılmasında əldə olunan nəticələrdən, eləcə də işğaldan azad olunmuş ərazilərdə qısa müddət ərzində görülmüş irimiqyaslı layihələrdən bəhs edilib, mötəbər beynəlxalq təşkilatların, o cümlədən Dünya İqtisadi Forumunun yekunlarına dair müqayisəli göstəricilərə geniş yer ayrılıb.

Akademik Urxan Ələkbərov mühazirəsində ölkədə əldə edilən bütün uğurların təməlində əsası Ulu Öndər Heydər Əliyev tərəfindən qoyulan inkişaf strategiyasının dayandığını diqqətə çatdırıb.  Akademik, Prezident İlham Əliyevin ölkəmizin dinamik inkişafına, ərazi bütövlüyünün və suverenliyinin tam bərpasına imkan yaradan iqtisadi islahatlar strategiyasının ölkənin təbii sərvətlərindən, intellektual resurslarından səmərəli istifadəyə əsaslandığını vurğulayaraq, elmi əsaslara söykənən bu islahatların Azərbaycanın inkişaf etmiş, biznes üçün əlverişli mühitinin mövcud olduğu ən qabaqcıl ölkələr sırasında 25-ci yer tutmasını təmin etdiyini bildirib. Onun sözlərinə görə, ölkəmizdəki xalq-iqtidar birliyindən qaynaqlanan ictimai-siyasi sabitlik amili, əlverişli biznes mühiti Avropanın enerji təhlükəsizliyində mühüm rol oynayan Azərbaycanın “yaşıl enerji” sahəsində də investisiya cəlbediciliyini yüksəldib.

FOTO