Tədbir çərçivəsində BDU-nun müəllimləri tərəfindən Bakı şəhər 119 və 256 nömrəli tam orta məktəblərində şagirdlərə iqlim dəyişikliyi, onun ekosistemə, ətraf mühitə və insan sağlamlığına təsirləri, ekologiyanın qorunmasında şagirdlərin üzərinə düşən vəzifələr barədə ətraflı məlumatlar verilib. BDU-nun Humanitar məsələlər və gənclər siyasəti şöbəsinin müdiri Ramin Səmədov, Həmkarlar İttifaqı Komitəsinin sədri Rəşad Cabarov  çıxışlarında günün önəmini qeyd edib, ölkəmizdə ekologiyanın qorunması istiqamətində həyata keçirilən dövlət siyasəti barədə məlumat veriblər. BDU-nun müəllimləri Qismət Xanbabayev “Yaşıl enerji ehtiyatlarının coğrafi paylanması və əhəmiyyəti”, Məhluqə Yusifova “İqlim dəyişikliyi problemi və onun Azərbaycana təsiri”, Qiyas Bayramov “Su ehtiyatlarının çirklənməsinin səbəbləri”, Günel Sarıyeva “Qlobal ekoloji problemlər və onların yaratdığı fəsadlar” mövzularında məruzələr edib, şagirdlərin suallarını cavablandırıblar.

Sonra tədbir hər iki qurumun könüllülərinin iştirakı ilə Türkan qəsəbəsində dənizkənarı ərazidə təmizlik aksiyası ilə davam etdirilib. Tədbir könüllülərin üzərində “Earth day” (“Yer Günü”) yazılmış plakat açaraq keçirdikləri fləş-mobla başa çatıb.

Qeyd edək ki, aksiyanın məqsədi ictimaiyyətin diqqətini günün əhəmiyyətinə yönəltmək, insanları, xüsusilə yeniyetmələri ekoloji maarifləndirmək, onları ətraf mühitin mühafizəsinə və təbiətə qayğı ilə yanaşmağa təşviq etməkdir.

FOTO