Neftçala rayon Heydər Əliyev Mərkəzində keçirilən konfransda Azərbaycanın tanınmış dilçi alimləri ilə yanaşı Türkiyə, Çin, İngiltərə və digər ölkələrdən olan tanınmış alimlər və gənc tədqiqatçılar da iştirak ediblər.

Qeyd edək ki, elmi konfrans Azərbaycan Respublikasının Prezidenti İlham Əliyevin “Azərbaycan dilinin saflığının qorunması və dövlət dilindən istifadənin daha da təkmilləşdirilməsi ilə bağlı tədbirlər haqqında” 1 noyabr 2018-ci il tarixli Fərmanına uyğun olaraq üçüncü ildir ki keçirilir.

Konfransı giriş sözü ilə açan Neftçala rayon Heydər Əliyev Mərkəzinin direktoru Könül Məmmədova qeyd edib ki, bugünkü konfrans çox vacib bir mövzuya həsr olunub və qloballaşan dünyamızda doğma dilimizin qorunub saxlanması qarşımızda dayanan ən vacib vəzifələrdən biridir. Kofransın açılışında iştirak edən Neftçala rayon İcra Hakimyyətinin başçısı Mirhəsən Seyidov, “Regional İnkişaf” İctimai Birliyinin nümayəndəsi Gülbağda Leysanova, Şirvan-Salyan Regional Mədəniyyət İdarəsinin rəisi Şahin Şahbazov və digər məruzəçilər çıxış edərək Ümummilli lider Heydər Əliyevin ana dilimizin inkişafı və qorunması ilə bağlı həyata keçirdiyi məqsədyönlü siyasətin əhəmiyyətini, dil siyasətinin müasir Azərbaycan dilinə təsirini xüsusi vurğulamış, dilimizin saflığının qorunması yönündə həyata keçirilən islahatlar, tərcüməşünaslığın aktual problemləri, dilçiliyinin son nailiyyətləri haqqında fikirlərini auditoriya ilə bölüşmüş, dünya dilçilik elminin inkişafı fonunda doğma ana dilinin tədqiqatına verdikləri töhfələrə görə elm xadimlərinə təşəkkür edərək iştirakçılara uğurlar arzulamışlar.

Sonra konfransın təşəbbüskarları AMEA Nəsimi adına Dilçilik İnstitutunun dosenti, filologiya üzrə fəlsəfə doktoru Qüdsiyyə Qəmbərova konfransın materialları əsasında nəşr olunmuş linqvistik toplunun təqdimatını edərək, kitabın uğurlu elmi araşdırmaların davamı kimi Azərbaycan dilçiliyinə dəyərli töhfəsi kimi dəyərləndirmişdir.

Konfrans Pekin Xarici Dillər Universiteti Asiya fakültəsi, Azərbaycan dili kafedrasının müdiri, filologiya üzrə fəlsəfə doktoru Aqşin Əliyevin moderatorluğu ilə müzakirələr formatında işini davam etdirib.

Konfrans çərçivəsində müxtəlif mövzularda təşkil olunan panel müzakirələrində Azərbaycanın müxtəlif ali təhsil və elm ocaqlarını, eləcə də dünyanın müxtəlif universitetlərini təmsil edən 85 alim aktual dilçilik mövzuları ilə bağlı ən son tədqiqatlarını təqdim etmişlər.

Sonda iştirakçılara sertifikatlar təqdim edilib, konfransın materiallarından ibarət xatirə jurnalının hazırlanması və “AZLİNG2024” konfransının növbəti ildə də keçirilməsi barədə qərar alınıb. Qeyd edək ki, konfrans materialları toplu halında nəşr olunacaqdır.

FOTO