13-15 noyabr tarixlərində Şəki və Lənkəran şəhərlərinin orta ümumtəhsil məktəblərində icra olunmuş kampaniyanın məqsədi müəllim, şagird və valideynlərin uşaq hüquqları sahəsində məlumatlılığını artırmaq və cəmiyyətin diqqətini uşaq hüquqlarının qorunmasına yönəltmək idi.

Kampaniya əsasında, ümumilikdə 300-dən çox məktəbli üçün uşaq hüquqlarına dair təlimlər və məlumatlandırıcı sessiyalar təşkil olunmuş, uşaqlar tərəfindən hüquqlarına dair müxtəlif tamaşalar səhnələşdirilmiş, komandalar şəklində mövzu ilə bağlı interaktiv yarış keçirilmişdir. Yarışın sonunda uşaq hüquqlarının pozulması ilə nəticələnən hər hansı problemin həllinə yönəlmiş ən uğurlu təkliflər təqdim edən komandalar hədiyyələrlə mükafatlandırılmışdır.

Həmçinin, “Nefes” Psixonevroloji Sağlamlıq Mərkəzinin psixoloqu Mahmud Mustafayevin dəstəyi ilə məktəblilər tərəfindən yaşadıqları regionun uşaq hüquqlarına dair problemləri xəritələşdirilmiş, valideynlər və məktəb icması üçün uşaq hüquqları sahəsində mövcud problemlər və həlli yolları, onların uşaqların psixoloji sağlamlığına təsiri, nümunəvi davranış qaydaları və digər mövzularda maarifləndirici seminar keçirilmişdir.

Qeyd edək ki, kampaniya çərçivəsində noyabrın 20-də "Vətəndaş Cəmiyyətində Debat" İctimai Birliyinin dəstəyi ilə Bakı şəhər məktəbləri üzrə Debat Forum da keçiriləcək.

FOTO