“İdeyadan biznesə” layihəsi çərçivəsində formalaşdırılan startapların regional seçim mərhələsi davam edir
“Regional İnkişaf” İctimai Birliyinin təşkilatçılığı, Rəqəmsal İnkişaf və Nəqliyyat Nazirliyi, Azərbaycan Gənclər Fondu, BMT-nin İnkişaf Proqramı (UNDP) və “SUP VC” akselerasiya proqramının dəstəyi ilə icra edilən “İdeyadan biznesə” (“I2B”) layihəsinin noyabrın 19-da Mingəçevir şəhərində regional seçim mərhələsi keçirilib.
Tədbirdə layihə müddətində inkubasiya proqramını uğurla tamamlamış
14 startap təqdimatı olub. Layihə çərçivəsində öz startaplarının ilkin
prototipini və ya minimal işlək məhsulunu hazırlamış Gəncə, Tovuz, Qəbələ,
Zaqatala, Şəki, Qax və Mingəçevirdən olan komandalar münsiflər heyəti
qarşısında təqdimatla çıxış ediblər.
Münsiflər
heyəti Mədəniyyət Nazirliyinin, Kənd Təsərrüfatı Nazirliyinin Aqrar İnnovasiya
Mərkəzinin, Azərbaycan Gənclər Fondunun, Rəqəmsal İnkişaf və İnnovasiyalar
Agentliyinin nümayəndələrindən ibarət olub.
Seçim turunda münsiflərin rəyi əsasında Zaqatala rayonundan “Yoll”, Mingəçevir şəhərindən “4 You” və Qax rayonundan “Magnoliya” layihəsi ən uğurlu layihə seçilərək Bakı şəhərində keçiriləcək finalda iştirak hüququ qazanıb.