Vətən yolunda canlarından keçərək Şəhidlik zirvəsinə ucalan igid oğullarımızın əziz xatirəsi xalqımızın yaddaşında daim yaşayacaq, dərin hörmət, ehtiram və minnətdarlıq hissi ilə xatırlanacaqlar. 

Torpaqlarımızın azadlığı uğrunda əbədiyyətə qovuşan qəhrəman oğullarımızın ailə üzvləri və yaralı qazilərimiz daim dövlət qayğısı ilə əhatə olunub.  “Regional İnkişaf” İctimai Birliyinin (RİİB) Azərbaycan Könüllü Həkimlər Assosiyasiyası və Azərbaycan Tibb Universitetinin Onkoloji Klinikası ilə birgə Beyləqan Rayon Mərkəzi Xəstəxanasında dekabrın 11-də təşkil etdiyi tibbi aksiya da bu həssas kateqoriyadan olan soydaşlarımız üçün dövlətin həyata keçirdiyi tədbirlərə dəstək xarakteri daşıyır.

Aksiya çərçivəsində Bakı şəhərində müxtəlif dövlət və özəl xəstəxanalarda çalışan onkoloq, kardioloq, radioloq, terapevt, pediatr, nevroloq, uroloq və digər ixtisaslar üzrə 32 nəfərdən ibarət könüllü həkim heyəti tərəfindən ümumilikdə 300 nəfərdən çox şəhid və qazi ailələrinin üzvləri müayinə olunmuş, müvafiq müalicə kursları təyin edilmiş, zəruri dərman vasitələri ilə təmin olunmuş, eləcə də digər patologiya aşkar olunan xəstələr ixtisaslaşmış tibb müəssisələrinə yönləndirilmişdir.

Aparılan müayinələr zamanı xəstəlik aşkarlanmış vətəndaşların sonradan ixtisaslaşmış tibb müəssisələrində tam müayinələrdən keçirilməsi, müalicəsi və zərurət yarandıqda cərrahiyə əməliyyatları həyata keçiriləcək.

RİİB könüllüləri vətəndaşların qeydiyyatı, növbələrin tənzimlənməsi və digər təşkilati işlərə dəstək veriblər.

Bu cür aksiyaların digər regionlarda da təşkili nəzərdə tutulur.

FOTO