150 +994505000150

"Erkən uşaqlıq dövründə inkişaf" layihəsi həyata keçirilir

18 sentyabr 2020
Paylaş
"Erkən uşaqlıq dövründə inkişaf" layihəsi həyata keçirilir

BMT-nin Uşaq Fondu (UNICEF) və “Regional İnkişaf” İctimai Birliyi tərəfindən Avropa İttifaqının maliyyə dəstəyi ilə "Erkən uşaqlıq dövründə inkişaf" (EUDİ) layihəsi həyata keçirilir.

2 il davam edəcək layihənin əsas məqsədi 0-8 yaş dövründə uşaqların sağlamlığı, düzgün qidalanması, təlim-tərbiyəsi, uşaqlarda inkişaf dinamikasının izlənməsi və inkişafın stimullaşdırılması ilə bağlı valideynləri, təhsil, tibb, sosial xidmət mütəxəssislərini, o cümlədən həssas qrupa aid olan uşaqlara qayğı göstərən şəxsləri maarifləndirməkdən ibarətdir.

Layihənin hədəf regionları olaraq Bakı, Gəncə və Şirvan şəhərləri, Ağcabədi və Abşeron rayonları müəyyən edilmişdir.

İctimai maarifləndirmə tədbirləri çərçivəsində artıq layihənin sosial səhifələri üzərindən tibb, təhsil və digər sosial sahələrdə çalışan mütəxəssislərin iştirakı ilə müxtəlif mövzularda canlı yayımlar təşkil edilir, eləcə də xüsusi animasiya videoları, məlumatlandırıcı posterlər və digər dizayn məhsulları paylaşılır.

Həmçinin, layihə çərçivəsində Təlim Mərkəzinin və portalın yaradılması istiqamətində intensiv işlər aparılır. Həmin mərkəzdə mütəxəssislər və valideynlər üçün təlimlər təşkil olunacaq, eləcə də erkən yaşdan uşaqların bioloji, psixoloji və emosional inkişafını stimullaşdırmaq və onlara düzgün qulluq göstərmək məqsədilə valideynlər və digər maraqlı tərəflər arasında geniş maarifləndirmə işləri aparılacaq.

Layihənin növbəti mərhələsində aidiyyəti qurumlar da cəlb olunmaqla müxtəlif dəyirmi masaların, konfransların təşkili, “Ailə festivalı” formatında silsilə tədbirlərin  keçirilməsi nəzərdə tutulur.

Xatırladaq ki, layihə 2019-cu ilin 18 oktyabr tarixində Heydər Əliyev Fondu ilə BMT-nın Uşaq Fondu (UNİCEF) arasında imzalanmış Anlaşma Memorandumu çərçivəsində həyata keçirilir. Memorandumda inklüzivlik və erkən uşaqlıq dövrünün inkişafı sahəsində birgə müxtəlif layihələrin həyata keçirilməsi, bu sahədə valideynlərin təhsil və təcrübələrini dəstəkləyən proqramların reallaşdırılması, ictimai maarifləndirmə işlərinin genişləndirilməsi nəzərdə tutulur.