Milli Onkologiya Mərkəzinin səyyar həkim briqadaları bölgə sakinlərini onkoloji xəstəliklərin erkən aşkarlanması və qarşısının alınması məqsədilə səyyar mammoqrafiya, ultrasəs və rentgen müayinələrindən keçiriblər. Skrininq proqramı əsasında noyabrın 17-18-də Biləsuvarda, noyabrın 19-20-də Astarada, noyabrın 21-22-də isə Lənkəranda ümumilikdə 3000-dən çox region sakininin ödənişsiz tibbi müayinəsi təşkil olunub.

Noyabrın 22-də Lənkəran Şəhər Mərkəzi Xəstəxanasında onkoloji xəstəliklər aşkarlanmış xəstələr üzərində Milli Onkologiya Mərkəzinin əməkdaşları tərəfindən  cərrahi əməliyyatlar aparılıb.

“Regional İnkişaf" İctimai Birliyinin könüllüləri vətəndaşların müayinələrə cəlb edilməsi və təşkilati işlərdə yaxından iştirak ediblər.

Skrininq proqramı çərçivəsində noyabrın 23-də Lənkəran şəhəri Heydər Əliyev Mərkəzində “Regional İnkişaf" İctimai Birliyi və Milli Onkologiya Mərkəzinin birgə təşkilatçılığı ilə “Bədxassəli şişlərin diaqnostika və müalicəsinə müasir yanaşma” mövzusunda elmi-nəzəri konfrans təşkil olunub.

Konfransda Milli Onkologiya Mərkəzinin həkim və mütəxəssislərinin “Baş-boyun şişlərinin müasir cərrahi müalicəsi”, “Sinonazal və intrakranial yerləşmiş törəmələrə endonazal endoskopik yanaşma“,“Uşaqlıq boynu xərçənginə müasir yanaşma“ , “Magistral damar rezeksiyası ilə peritonarxası törəmələrin çıxarılması”, “Milli Onkologiya Mərkəzində uşaq endoskopiyası”, “Süd vəzi xərçəngi epidemiologiya, risk faktorları, diaqnostikası”, “Uşaqlarda onkoloji xəstəliklərin erkən diaqnostikası”, “Onkourologiyada müasir diaqnostika və müalicə”, “Onkoloji diaqnostika və müalicədə yeni trend: nüvə təbabəti” mövzularında məruzələri dinlənilib. Konfransda cənub bölgəsi və qonşu rayonlarda çalışan 150-dən çox onkoloq, ginekoloq, endokrinoloq, uroloq və cərrah iştirak edib.

Sonda iştirakçılara sertfikatlar təqdim olunub.

“Regional İnkişaf" İctimai Birliyi və Milli Onkologiya Mərkəzinin birgə təşkilatçılığı ilə skrininq proqramlarının Azərbaycanın digər bölgələrində də reallaşdırılması nəzərdə tutulur.

FOTO