150 +994505000150

Heydər Əliyev İncəsənət Məktəbində “Müasir fotoqrafiyanın əsasları” mövzusunda treninq keçirilib

03 noyabr 2016
Paylaş

Heydər Əliyev Mərkəzi və “Regional İnkişaf” İctimai Birliyinin (RİİB) təşkilatçılığı ilə Masallı rayonu “ASAN Həyat” kompleksindəki Heydər Əliyev İncəsənət Məktəbində “Müasir fotoqrafiyanın əsasları” mövzusunda treninq keçirilib. 

 

Region gəncləri və ali məktəb tələbələri uçün təşkil olunan treninqdə tanınmış rejissor-operator, ssenarist, prodüser İsrafil Ağazadə foto çəkilişin sirləri barədə danışıb.

 

Treninqin əsas məqsədi gəncləri fotoqrafiya sənətinin əsasları ilə yaxından tanış etmək, onların gələcəkdə peşəkar fotoqraf olmaq arzularının reallaşmasına dəstək göstərməkdir.

 

Təlim zamanı fotoqrafiya sənətinin əsasını təşkil edən amillər - fotokompozisiya, işıqlandırma, rakurs, ekspozisiya və digər məqamlar, eləcə də yeni rəqəmsal texnologiyaların imkanları baradə ətraflı məlumat verilib.

 

Bildirilib ki, bu gün müasir fotoqrafiya həm də geniş dünyagörüşü tələb edir. Bunun üçün fotoqraf müxtəlif elmlərdən, cəmiyyətdə baş verən hadisələrdən xəbərdar, cəsarətli, vətənpərvər olmalı, müasir texnologiyalardan məlumatlı, yüksək zövqlü olmalıdır.

 

Mühazirədən sonra gəncləri maraqlandıran suallar ətrafında diskussiya olub.  

 

Qeyd edək ki, İsrafil Ağazadə Moskvada Ümumittifaq Dövlət Kinematoqrafiya İnstitutunda A.V.Qalperinin emalatxanasında təhsil alıb. Hazırda Azərbaycan Dövlət Mədəniyyət və İncəsənət Universitetinin müəllimidir. İsrafil Ağazadə müxtəlif janrlarda, xüsusən də portret, şəhər həyatı, idman janrlarında fotoların müəllifidir.

 

Qeyd edək ki, Masallıda açılan “ASAN Həyat” kompleksindəki Heydər Əliyev İncəsənət Məktəbi regionlarda istedadlı, xüsusi qabiliyyətli gənclərin aşkara çıxarılması, onların milli-mənəvi dəyərlərə, tarixə bağlı ruhda böyüməsi istiqamətində fəaliyyət göstərir. İncəsənət Məktəbində eyni zamanda müxtəlif sərgi, tədbir, təqdimat və təlimlər keçirilir.